ბათუმში Ad Black Sea 2018 გაიმართება

20 აგვისტო 2018

10:30

ყოველი სექტემბრის მიწურულს, სრულიად საქართველოს და რეგიონის შემოქმედებითი ინდუსტრია ზღვისპირა ქალაქს მიაშურებს, რომ ქართული საერთაშორისო სარეკლამო ფესტივალი Ad Black Sea იზეიმოს. უკვე მეოთხე წელია, ბათუმში ერთმანეთს ხვდება 500-ზე მეტი დელეგატი, 20-ზე მეტი ქვეყნიდან, რომ დინამიკურ რეჟიმში, შეიგრძნოს სარეკლამო ინდუსტრია, როგორც ცოცხალი ორგანიზმი, ერთმანეთს შეუნაცვლოს ათობით სემინარი, გასართობი ღონისძიებები და ფესტივალის კულმინაცია – საუკეთესო კრეატიული ნამუშევრების დაჯილდოება. ესაა კრეატივის სამდღიანი დღესასწაული, რომელსაც ემსახურება როგორც სარეკლამო სფეროს, ისე კრეატიული ინდუსტრიისა და საქართველოს ტურიზმის განვითარებას.

Ad Black Sea-ს კონცეფცია 3 ძირითადი კომპონენტისგან შედგება: შემეცნებითი, გასართობი და საკონკურსო. კომუნიკაცია მიმდინარეობს როგორც offline, ისე online რეჟიმში. ღონისძიებაში მონაწილეობა საინტერესოა ყველასთვის ვინც რაიმე ფორმით დაკავშირებულია შემოქმედებით ინდუსტრიასთან, მოღვაწეობს პიარის და მარკეტინგის ინდუსტრიაში ან საკუთარი სტარტაპი აქვს.

ახლოვდება დრო, როდესაც სხვადასხვა ქვეყნიდან შეკრებილი ასობით “მეზღვაური” და “მეკობრე” შეესევა ბათუმის სანაპიროს. Ad Black Sea-ის სეზონი უკვე დაწყებულია.